بابكر سلك

في السلك..  معقوله ده لاعب الوادي المنحدر؟

*تسجيل صوتي لافي القروبات منسوب للاعب وادي نيالا

*يطمئن فيهو جماهير الهلال في خصوص شكوي المريخ

*لم يطمئن فيهو جماهير وادي نيالا على انفراد الفريق بالمركز المتقدم الذي ناله عن جدارة

*ولكنه طمأن جمهور الهلال

*وجمهور الهلال طبعا يحتاج لتطمين وتطبيب وتطبيع كمان

*لأنهم مع سودا ده من زمن شيبولا أظنهم ماغلبوا المريخ

*وسوداكال الذي في عهده نال الزعيم ثلاث بطولات ممتاز متوالية

*ليس بفضل سوداكال وحده بالطبع

*ولكن بتضافر الجهود المريخية والتفافها حول مريخها برغم الصراع الذي بلغ عمره أربع سنوات متواصلة

*لكن طبعا سودا فال خير

*ومتعهد هزائم الهلال

*شي بمبان وشي سماني وشويات تيري والجزولي في الصف

*لذا فعلا جمهور الهلال في حاجة للتطمين

*ولكني برغم كل ذلك أستبعد أن يكون التسجيل للاعب وادي نيالا

*لأنو ده ما تفكير زول غلب المريخ بجدارة

*لكن التحية لصاحب التسجيل

*لأن ما قام به يعتبر من أعمال رفع المعنويات ودعم للفقراء والمساكين

*فالزول لما يكون صفر

*بحتاج بالتأكيد لرفع معنويات

*المهم

*لسه نحن مختلفين؟

*خلافاتنا دي ليه ما بتشعلل إلا في نهاية الموسم؟؟؟؟

*يعقوب حيرنا

*المهم

*أنا سعيد بما يحدث

*فالخلاف الفكري ظاهرة صحية كانت غائبة عن المريخ في عهود الراعي والرعية

*وطالما الناس مختلفة في المريخ لا على المريخ

*يبقى مافي خسارة

*كثير من قادة الصراع وحوارييهم في الطرفين

*ينشدون صالح الكيان ويقاتلون لأجله مسلحين بالفكرة

*وهذا لايمنع أن في الجيشين من جند نفسه طمعا في الغنائم

*في زمن الرسول الكريم عليه أفضل الصلاة والتسليم

*في ناس كانوا بخرجوا للحرب بدافع رفع الراية

*وناس كانوا بخرجوا للغنائم

*كلو واحد يخرج للخرج ليهو

*ويظل المريخ متسعا للجميع

*لا يعرف جهوية ولا يعترف بعنصرية

*وللقانون ونظام ٢٠١٩ الحاكمية

*أيها الناس

*غرزة كان أحسن مدرب إلى ٢٠١٧

*بقى أكعب مدرب في ٢٠٢١

*في أربع سنين عجز وخرف ونظرو ضعف ونسيبو العرس بتو محامي مختص بأمور الفيفا

*مش قلت ليكم في ناس بخرجوا للغنائم

*أيها الناس

*إن تنصروا الله ينصركم

*أها

*نجي لي شمارات والي الخرتوم

*والينا

*يعني نحن بنعرف أحسن من ربنا؟؟؟

*ربنا موش أمر بقطع يد السارق فينا

*وفي واحدين قال من خلاف أيدينا ورجلينا

*وواحدين يصلبوا يا والينا

*أسي لو فعلنا الحتة دي يا والينا

*ماكان أرحم لينا

*ما كان من اللفحي وتسعة طويلة ونطوا الحيطة وكتلوا سيد البيت ارتحنا يا أخينا ؟؟؟؟؟

*ومن المهربين وبتاعين المخدرات والهيروين والفي الدولار متاجرين

*ديل دحين ما هم الذين يعيثون في الأرض فسادا يا والينا؟؟؟

سلك كهربا

ننساك كيف والكلب قال إذا بتكتل زول عشان موبايل يبقي تتكتل عشان الزول سيد الموبايل

وإلى لقاء

عن admin

شاهد أيضاً

من سلطنة عمان سلام ****الإعلام رسالة  سامية والقلم أمانة.

  * يعتبر الإعلام بجميع أشكاله وسيلة فعالة لنشر الخبر ولفت الأنظار لحدث (ما) ،،، …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *