محمد الطيب كبور 

خليك واضح.. محمد الطيب كبور.. يامراكبي عدينا !!

زمان كنا بنستمتع بركوب البنطون (معدية توتي ) نخش جناين توتي نلف فيها ونرجع نركب المعدية حاجة منتهي الروعة ونختمها بفيلم في قاعة الصداقة الواحد معنوياته بتكون في السماء الشعور الجميل دا كان حاضر يوم الخميس وعبر فريق توتي ركبنا المعدية وقمة الروعة عشناها مع هدف توتي الأول في شباك الهلال قووون سمح زي جناين توتي لكن الحكم عمل حركات الأفلام الفي قاعة الصداقة وحسب ضربة جزاء روتينية للهلال ورجعت المباراة لنقطة البداية لكن التواتة ماسكتوا وعدوا مرة ثانية للشباك الزرقاء طوالي الحكم رفع خمسة دقائق زمن إضافي طبعا الكلام دا أثر في لاعبي توتي واستقبلوا هدف أزرق مرضي جدا للحكم ووللجنة التحكيم وللاتحاد العام ولو ماالهلال جاب قووون التعادل الزمن الإضافي كان حسبوا عليه زمن إضافي زيادة عشان الهلال ما يطلع مغلوب ..

الأقلام الزرقاء قبل مباراة ازرقهم مع توتي انتفخوا باعتبار أنهم حسموا الدوري لأنهم عولوا علي فارق الخمسة نقاط وطبعا حتي لو اتغلبوا من المريخ و(دا الطبيعي) حايكونوا حققوا اللقب وقفلوا الطريق أمام التوالي الرابع للزعيم عشان كدا قالو ايه الدوري محسوم نفكر في الأرقام القياسية ومع تفكيرهم في الأرقام القياسية جاتهم الضربة القاسية وحصل الغرق في توتي مرتين ولكن الدعم اللوجستي كان حاضر بضربة جزاء وزمن إضافي من مافي وتلخبطت عليهم الحسابات والرجفة بقت حاضرة رغم أنهم متقدمين علي المريخ بثلاث نقاط الا ان نظام البطولة الحدد الحسم بالمواجهات المباشرة قوم نفسهم وزاد عليهم الضغط عشان هم عارفين المريخ ناوي علي التوالي الرابع وشعارو التفريط ممنوع في لفات الحسم الخمسة القادمه وطبعا الختام حايكون ليلة التتويج والزبون كان عايز يدخل بحسابات محسومة ولكن لقت حفلتنا قاجه وشغالين نغني يامراكبي عدينا وعلي توتي ودينا ..

نحن من هنا بنقول للاهله خليكم مع الأرقام القياسية اهو حاجة تسكتوا بيها جماهيركم المغلوبة علي أمرها عايزين لقب الهداف مش مشكلة شيلوه اصلا الولد ياداب مارق من عندنا بنفرح ليو رغم حركتو الجبانه المابتخلو من خيانه والحكام ماقصروا معاه كم وكمين ضربة جزاء فوق الدستة واهو حسم لقب الهداف واي رقم قياسي تاني برضيكم ما عندنا مانع نحن كفاية علينا الدوري والتوالي الرابع والدوري بعد دا ولع وفي ليلة الختام في فريق بتشلع ..

أكثر وضوحا

قلنا ليكم القصة دي لسه والكورة ما فيها حسم قبل صفارة النهاية قلتوا لا الفارق كبير وخمسة نقاط تاني مابنتلحق لمن بقيتوا بتاعين أرقام قياسية اهو حاليا الجرسة حاصلة ..

وزي ماقلنا مابنرمي المنديل كمان مانفرط في التفاؤل والشغل لازم يكون بتركيز اصلو اللفات الأخيرة بتكبر فيها الدوافع ونقطة حقيقة بتفرق عشان بتنقذ من الهبوط وكل مباراة حاتكون فيها دوافع كبيرة ..

مباريات المريخ القادمه أمام ( حي الوادي وهلال كادقلي وهلال الفاشر ومريخ الفاشر والهلال الخرطوم ) هي مباريات البطولة والتفريط فيها ممنوع فقط العلامة الكاملة بغض النظر عن نتائج الهلال ..

القرعة أوقعت المريخ أمام منافس شرس ومتطور هو الاكسبريس الاوغندي بطل الدوري
الاوغندي وهو صاحب تاريخ في المشاركات الإفريقية وهو فريق محترم يستحق كل الاحترام ولابد من التحضير الجيد لملاقاته ..

في عيد الجيش السابع والستون قدامي لاعبي المريخ درشو قدامي لاعبي الهلال بثلاثية هدفين جبرة وهدف لملك السنتر نورالدين عنتر وزيكو رفع الكاس دي البروفة والفيلم ان شاءالله نهاية الممتاز ..

مجرد سؤال

توتي جزيرة ولاشبة جزيرة ؟؟

عن admin

شاهد أيضاً

من سلطنة عمان سلام ****الإعلام رسالة  سامية والقلم أمانة.

  * يعتبر الإعلام بجميع أشكاله وسيلة فعالة لنشر الخبر ولفت الأنظار لحدث (ما) ،،، …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *