بابكر سلك

بابكر سلك يكتب: ترويج ام احتيال!

بسم الله الرحمن الرحيم

بابكر سلك

في السلك

ترويج ام احتيال!

*الدعاية
*او الترويج عن السلعة
*هو اسلوب تسويقي قديم
*اتوجد قبل مايتوجد علم التسويق وفنونه
*وطبعا الدعاية بتزيد السلعة محلبية
*عشان كدة زمان الناس كانوا بقولوا للزول المامقنع دعاية
*يعني نجم كورة مثلا يضيع قون او تطول منو الكورة
*تلقي الاستاد كلو يكورك دعاية دعاية
*والقصة دي بتظهر كتير في مباريات الكورة لما احد فريقي القمة يلعب في الولايات ويتغلب ولا يتعادل
*تلقي الولاية كلها حول بص القمة تهتف دعاية دعاية
*المهم
*ضروري جدا في الترويج ان يظهر مزايا السلعة ومكوناتها ومقوماتها
*قانونا مسموح ليك تزيد المحلبية حبة
*لكن قطعا تكون مسؤول قانونا اذا زادت المحلبية عن حدها
*لان الموضوع بقلب من ترويج الي احتيال
*فما ممكن مثلا تقول في عالم الفسخ والجلخ ان الخلطة بتاعتك مافيها صباعات
*ويتضح انو فيها صباعات
* الواحدة البشرتها حساسة ومابتنفع معاها الصباعات
*اذا استعملت الخلطة بناء علي الترويج المضلل وتضررت
*فانها تستطيع ان تعود علي صاحب الخلطة المروج لها بالتعويض
*لكن لو في الترويج مثلا قالوا وشك ببقي زي القزازة
*وجابوا لقطة لواحدة اساسا خلقة ربنا وشها قزازة
*ده مابيعتبر احتيال
*مجرد ترويج لانه لم يتناول مكونات الخلطة بالكذب
*عشان كدة الفرق بين الترويج والاحتيال شعرررره
*طيب
*ناس الكهربا قالوا لينا كهربتهم ٢٢٠ الي ٢٤٠
*وقامت جاتنا اقل من ١٦٠
*الاسبليت مابتشغلو
*الاسبليت الدفعنا فيهو دم قلبنا شان خاطر رمضان
*الاسبليت الكلفنا ربع مليار جنيه
*لما يبقي قاعد علي الحيطة زينة ومسكن للعنكبوت
*كلام ناس الكهربا ٢٢٠ الي ٢٤٠ وهم عارفين إنو ١٢٠ مامضمونة ببقي ترويج ولا احتيال؟؟؟؟
*بالذات اذا واحد ترك صيام القاهرة واشتري بحق السفر اسبليت معتمدا علي تصريح ترويجي لمسؤول كهربائي بان الكهربا ستستقر في رمضان
*وجا رمضان
*والكهربا في زواعتها لا استقرت ولا شى
*وعاني صاحبنا ويلات رمضان في السودان
*وكلنا يعلم ماهو رمضان في السودان
*الاتنين مابتلمن في ظل ترويج كهربائي يصل لدرجة الاحتيال
*ماهو يارمضان يا سودان
*والله لو كنا بنعرف حقوقنا كان كل عشرين مدعي عليه في محكمة
*تلقي تسعطاشر منهم شركة النور
*ويا حليل شركة النور
*لسسسة ماسقطت
*طالما الكهربا قاطعة ولم تسقط نقطة ماء من ماسورة
*ناس الموية ديل كمان اكبر ماسورة
*لان معطيات الموية مصدر زائد شبكة توزيع
*يبقي الموضوع ماصعب
*ومافي حاجة اسمها مشكلة موية
*المشكلة هي الناس الماسكين الموية وممسكننا الماسورة
*الغريبة الموية لاترويج لا دعاية ولا احتيال
*قطع ناشف بكل قوة عين
*وشهداء الثورة ينتظروننا في الآخرة والسنتهم تلهج بسؤال
*الموية والكهربا جنكم ولا متنا سااااي؟؟؟؟؟

*بمناسبة الترويج دي
*زمان كان التجار بنزلوا السلع القربت مدتها تنتهي للفريشه يبيعوها باسعار زهيدة
*صاحبنا اوهو اناناس فرشو جمب البوسته وقعد يكورك
*الانناس يا ناس العلبة بجنية
*اتجدع وجدع اولادك
*الوكت داك علبة الانناس كانت بستة جنيه
*وصاحبنا ببيع المدتو منتهية العلبة بجنيه
*جاهو واحد قال ليهو اديني عشرة علب
*صاحبنا قال ليهو عشرة ليه؟وااااحدة بتقرضك انت واولادك
*شوفوا الزول ده
*برغم انو ببيع سلعة غذائية مدتها منتهية
*الا انو زول بخاف الله
*لم يستخدم الترويج الاحتيالي ولا الاحتيال الترويجي
*فرش بضاعتو وباع علي عينك ياتاجر
*وسيد البضاعة النزلها للفريشة
*عامل ليهو مصلي في خشم الدكان وسيخة معلق عليها عشرين ابريق وشابك الناس الصلاة الصلاة
*وكأن الله الذي يخدع عباده ويبيعهم السلع المنتهية الحاتوديهم في داهية
*يختلف عن الله الذي يدعو الناس للصلاة تقربا له
*عشان الحتة دي اضم صوتي لانصار الوحدانية واقول
*الله واحد ياناس

*المهم
*المريخ لمعسكر القاهرة
*وكلارك في انتظاره هناك
*شكرا تازي
*ايها الناس
*ان تنصروا الله ينصركم
*اها
*نجي لي شمارات والي الخرتوم
*عندكم كهربا يا والينا؟؟؟
*طيب عندكم موية؟؟؟؟
سلك كهربا
ننساك كيف والكلب قال طيب عندكم ضمير؟؟؟؟؟
والي لقاء
سلك

عن admin

شاهد أيضاً

بابكر سلك يكتب: الثورة إنسرقت أقصد إنطلقت

] والله الواحد بقى ماعارف يبدأ من وين ولا من وين. ] الثورة صناعتنا. ] …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *