بابكر سلك

سلك يكتب: صلاة العيد إلا يجي الإمام براهو

في السلك
صلاة العيد إلا يجي الإمام براهو
*ياحليل رمضان
*مافضل فيهو شئ
*كمل ومافهمنا فيهو حاجة
*للأمانة هو لما جا لقانا مافاهمين حاجة أساسا
*تلاتا بدت وتلاتا عدت وتلاتا سردبت والجاية العدة في السهلة والبيت زي الشعر المنقوض كلو حته متجهه حته والبعدها الستائر فوق
*وشمارات الدنيا تحمل إلينا بشتنة كورونا لأهلنا الهنود
*الدفن بالبوكلينق والحريق بالغابة والجثامين ماكملت
*احتفال الإخوة الهنود الملياري ورقصهم دون اعتبار الالتزام بالتباعد الاجتماعي
*أدى لانتشار كورونا بينهم بسرعة انتشار النار في الهشيم
*وده حالتو نخرينهم صغاااار
*حفلة زي دي لو كنا فيها نحنا بي نخريننا الزي كرعين الردا ديل
*كان انقرضنا في الفاصل الأول وقرضنا الكورونا ذاتها معانا
*وعلى الرغم من أننا شعب مهمل لايلتزم بالموجهات والتوجيهات والارشادات
*إلا أننا شعب خواف جداً
*القرض القرض أهلنا في الهند ده حايؤثر على تهجدنا
*كل زول في جامع
*والغريبة صلاة العيد
*احتمال الإمام يجي براهو
*نسأل الله الستر وأن يشفي المرضى ويحفظ الناس
*عاينت لفيديوهات الهند
*نظرت لي أهل سبنا و آي شواية راي وبريانكا شوبرا وديبيكا بادوكان
*لقيت ليك ده شعب لاتستطيع ـن تعيش بينه في تباعد
*موش لو في كورونا
*لو في لغم ذاتو
*تتباعد كيف بس والجمال الجاذب ده يجرك زي المغنطيس
*نحنا غايتو بي خلقنا دي مقومات التباعد متوفرة لدينا
*لكننا لواييق ساي
*أيها الناس
*إنها الموجة التالتة
*والتالتة واقعة
*حقو نديها اعتبارها ونتبع الإرشادات عشان نعيش
*مادايرين نموت قبل مانعرف آخرها شنو
*دايرين نشوف لقطة النهاية مع THE END حايكتبوا شكراً حمدوك
*ولا المخرج حايخلي كلمة النهاية لخيال المتفرج
*مادايرين نموت قبل مانعرف آخرتا
*لانو هناك اكيد من سبقونا مع دفنتنا كده حايسألونا
*حق الشهداء رجع؟؟؟
*عرفتوا منو الأمر بفض الاعتصام؟
*التعاون وسلعتي اتصالحو؟
*الحاجات رخست؟
*بقرنا ولحمنا لسه في الواجهة؟
*محافظين على فشقتنا ولا فرطنا؟؟؟
*الجنيه العام رسى على بر ولا لسه؟
*وممكن نلقي سعودي في الآخرة يسألنا
*من يحكمكم من آل سعود؟
*نودي وشنا منو وين عاد؟؟؟
*عشان كده أخي الكريم التزم بالتباعد والكمامة والموجهات إلى أن تلقي إجابة على الأسئلة أعلاه
*لو مشيت بدون ماتعرف الإجابات على الأسئلة أعلاه حاتتحرج من ناس الآخرة ويعملوك مضحكة.
*المهم
*الفيفا قالت شنووووو؟؟؟؟؟
*أيها الناس
*إن تنصروا الله ينصركم
*أها
*نجي لي شمارات والي الخرتوم
*كان شفت ياوالينا
*مافاهمين أي حاجة بقينا
*والغريبة بناكل ونشرب يا والينا
سلك كهربا
ننساك كيف والكلب قال ياسلام على شعب كالأشجار مابياكل وواقف حيلو ليهو ضل
وإلى لقاء
سلك.

عن admin

شاهد أيضاً

من سلطنة عمان سلام ****الإعلام رسالة  سامية والقلم أمانة.

  * يعتبر الإعلام بجميع أشكاله وسيلة فعالة لنشر الخبر ولفت الأنظار لحدث (ما) ،،، …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *