بابكر سلك

بابكر سلك يكتب: كريم لكن سخن

في السلك
بابكر سلك
كريم لكن سخن

*قام من بلدنا تاني رحل زول جميل
*زول من أجمل الناس إن لم يكن أجملهم على الإطلاق
*رحل الكوباني
*فغاب المداد للحداد
*وعدت وأنا لا أعرف الكثير عن دكتور كوباني
*لا أعرف عنه سوى أنه أشطر طبيب في مجاله وأنزههم
*لا أعرف عنه سوى أنه أعمق أديب وأفصحهم
*لا أعرف عنه شيئاً إلا أني معجب حد الثمالة بأسلوبه المرح الذي يتناول به كبريات المشكلات وأعمقها
*كان يشرحها بدقة ويتوصل لأسباب موت الجمال في بلد جميل شوهته مشارط الشتر
*كان يقول رأيه بوضوح تكسوه الطرفة وكأنه يردد مع جماعة الجو الرطب
*الضحكة من أعماقنا ثورة بتفجر الحزن الكتلنا
*كان شاعراً مجيداً وفريدا ووحيداً في بعض الأوقات
*لا أعرف عنه سوى إنسانيته وحبه للوطن بشهية تفتح ذراعيها لتحتضن وطناً ومواطناً
*ولأني لا أعرف عنه سوى ما ذكرت
*لم أستطع أن أنعيه
*تركت ذلك لأناس يعرفونه أكتر مني
*ولكني بكيت عليه
*وترحمت عليه
*وسألت نفسي
*في بلادي لماذا يعجل بالرحيل أي زول جميل ؟؟؟؟

*المهم
*رمضان سخن
*لكن يسخن يبرد نحن له
*الغايه أعمق من لفحة شمس وعطشة ساعات
*جعنا دهوراً ثم انتصرنا
*فكان الجوع حلاوة النصر
*وها نحن نعاني سخونة الأجواء وتأتي حلاوة الموية في المغرب
*ضيق وفرج هي الدنيا
*تحمل لأجل غاية يهون في سبيلها كل غالٍ ونفيس
*وتنتصر المبادئ والقيم والشعوب والأوطان
*اللهم تقبل منا رمضان ده وبلغنا رمضان داك وارفع العقوبة عن رمضان عجب بقرار واضح من كاس.

*المهم
*العشرة الأوائل تمن
*العشرة التواني بدن
*العشرة الأواخر استعدن
*رمضان كريم نعم
*لكن كريم سخن
*آخر تلاتة يوم في العشرة الأوائل كانن بشبهن التلاتة الأخيرات في العشرة الأواخر
*ياخ قابلت صديقي إيهاب بر يوم واحد رمضان
*لقيت وشو بشبه يوم تلتين رمضان
*السنام مافيهو شئ
*وفطور رمضان مافيهو سلطة روب
*ولو فتحت خشمك قلت الروب
*الشفع بتذكروا الزبادي
*والكاس بقي بميتين وخمسين ألف جنيه
*ماعندك سلطة روب
*وحتى الروب ماتقدر تقولها
*إنها قسمتك يامحمد أحمد همتك
*بس تذكر صوتك أمانة في ذمتك
*وماتخلي حرامي قمتك
*ماتخليهو يسرق طموحك ويبلع لقمتك

*اللهم وارحم عبدك إدريس ديبي
*ولا تفتنا بعده يا الله
*ولا تفتنا بعده يا الله
*ولا تفتنا بعده يا الله
*الفتنة بعدو حاره الله يسترنا منها

*أيها الناس
*إن تنصروا الله ينصركم

*أها
*نجي لي شمارات والي الخرتوم
*تعرف يا والينا
*لو ماهاميكم ماهامينا
*بس الناس لو زاد أنينة
*والبعوض لو زاد طنينة
*ماحانسد دي بي طينة
*وما حانسد دي بي عجينة
*الدنيا فتحت عيننا
*وبنحلها يا والينا
سلك كهربا
ننساك كيف والكلب قال الدايرنا عيشة عز وعدالة والمابينا يشتت هو مابنقسم ليهو بلدنا
والي لقاء
سلك.

عن admin

شاهد أيضاً

بابكر سلك يكتب: الثورة إنسرقت أقصد إنطلقت

] والله الواحد بقى ماعارف يبدأ من وين ولا من وين. ] الثورة صناعتنا. ] …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *