بابكر سلك

بابكر سلك: جمهورية البرجان الديمقراطية

*طرنا
*وطارو
*اربعة فرق طارت
*طارووووووو
*وكأن انديتنا ابراج حمام
*طوااالي طايرين
*غايتو نحنا بسجمنا ده حمام اخير من الحمام الزاجل
*الزاجل الطاير طوالي
*الزاجل الصفر
*لكن كلنا في الهوا سوا
*كان لازم نطير
*بل مفروض نطير حتي قبل بدء التنافس
*لاننا نستحق ذلك
*لاننا ندير الرياضة علي مستوي الاتحادات وعلي مستوي الاندية بهذه الطريقة العقيمة القميئة
*كل زول عندو حبة قريشات يهرول الجميع نحوه وينصبوه زعيم لقيادة النادي
*اي زول ركب برادو طمع يكون عضو مجلس في النادي
*وكأن ركوب البرادو او الفي اكس آر يمنح المؤهل اللازم لعضوية المجالس
*البلد دي كدة
*تكون نكره
*تكون جاهل
*تكون اي حاجة
*تجيك قريشات
*طوالي تفكر في دخول البرلمان ورئاسة ناد قمة
*ثم تدخل في زمرة رجال البر والاحسان ايا كان مصدر تلك القريشات
*لا زلنا نعيش جاهلية قول الشاعر
*ان الدراهم تكسو الرجال هيبة ومهابة
*الهيبة هينة
*تعال شوف الباقي
*فهي اللسان ان اراد كلاما
*تخيل زول ينضم لي زول
* كسيرتلج في رمضان ده مطلوب
*لكن لو جيت للشطر الاخير تلقي
*وهي السيوف ان اراد قتالا
*هي حصلت!!!!!!
*ايها الناس
*طالما لسة بنبحث عن صاحب المال ليقود عقول الرجال
*يبقي لازم نطير ونطير ونطير الي ان تطير تلك الفكرة السيئة
*نعم الاندية تحتاج للمال
*وتحتاج للافكار
*ولكن الافكار قبل المال
*لانو المال السايب بفرق الحبايب وبعلم(الحدرة)
*ثم تعلو الافكار وتسمو لتخلق للنادي ذمة مالية تعفيه من الذله الادارية التي تعتمد علي انا ادفع لوحدي انا اقرر لوحدي
*والقصة دي لاتعني المتعلمين
*بل تعني اصحاب المبادئ
*فكم من متعلم لا مبادئ له
*وكم من عالم لم يزيل علمه بلمه
*عشان كدة لازم نطير ونشبع طيران

عن Altigani

شاهد أيضاً

بابكر سلك يكتب: الثورة إنسرقت أقصد إنطلقت

] والله الواحد بقى ماعارف يبدأ من وين ولا من وين. ] الثورة صناعتنا. ] …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *